Lart

Sindroma e Apneas së Gjumit

Si të kuptoni që keni sindromën e apneas së gjumit.

Kjo sindromë ndodh vetëm në gjumë. Të parët që e vënë re janë familjarët, të cilët referojnë se personi gërhet shumë dhe në disa momente duket sikur mbytet në gjumë, sikur nuk merr frymë.

Disa nga shenjat klinike që shfaqen kryesisht gjatë natës janë:

• Gërhitja (> 2 netë në javë)

• Dëshmi për apne (nga një person tjetër)

• Episode mbytjeje gjatë natës

• Pagjumësi

• Etje

• Urinim të shpeshtë gjatë natës

• Bllokim të hundëve

• Refluks gastrik

Apnea e gjumit është një çrregullim që karakterizohet nga ndalimi i frymëmarrjes gjatë gjumit, për 10 ose më shumë sekonda, duke bërë që personi të ngrihet krejtësisht nga gjumi, ose të dalë nga stadi i gjumit të thellë. Mund të ketë rreth 5-30 ndalesa të tilla në një orë tek këta persona. Ndërprerja e stadit të gjumit të thellë bën që personi në ditën pasardhëse të mos jetë i çlodhur, pavarësisht orëve që ka fjetur. Apnea e gjumit nuk ndikon vetëm gjumin gjatë natës por edhe jetën gjatë ditës. Ja disa prej simptomave që vuan një person nga apnea e gjumit. Ditën: Përgjumësi e zgjatur, rendiment i dobët, dhimbje koke e mëngjesit, keqësime të intelektit, kujtesë e dobët, përqëndrim i dobësuar, shenja të depresionit. Natën: Gërhitje, gjumë i keq, pagjumësi, marrje fryme, zgjime të shpeshta, djersitje, reduktim i libidos/impotencë.

Ekzistojnë 3 tipe të apnesë së gjumit:

Apnea e gjumit qëndrore, ndodh atëherë kur truri nuk dërgon impulse në muskujt e frymëmarrjes për të realizuar frymëmarrjen. Kjo apne haset tek të porsalindurit; të rriturit me sëmundje të zemrës, sëmundje cerebrovaskulare, por mund të shkaktohet dhe nga disa medikamente. Apnea e gjumit obstrutive ndodh atëherë kur truri dërgon impulse për tkurrjen e muskujve të frymëmarrjes, por tkurrja është e pasuksesshme, sepse rrugët e frymëmarrjes janë të bllokuara dhe pengojnë kalimin e ajrit. Individët me apne obstruktive gjumi gërhasin gjatë gjumit; janë të përgjumur gjatë ditës; janë të lodhur; kanë pakësim të përqendrimit, performancës dhe të kujtesës. Mund të kenë dhimbje koke në mëngjes, mund të jenë të irrituar dhe depresiv, mund të urinojnë shpesh gjatë natës dhe të jenë impotent. Apnea obstruktive e gjumit mund të jetë e lidhur dhe me pagjumësinë; sëmundjet kardiovaskulare, por edhe mund të ndikojë direkt në shfaqjen e tyre, pasi shkakton rritje të presionit arterial. Apnea a gjumit mikse ku janë të pranishme si apnea e gjumit qëndrore edhe apnea e gjumit obstruktive.

DIAGNOSTIKIMI

Zakonisht bashkëshorti apo bashkëshortja tregojnë rreth ndërprerjeve të gjumit. Krahas analizave të njohura të përgjithshme, ajo më e vyera është polisomnografia. Për këtë analizë i sëmuri shtrohet në spital një natë gjatë së cilës maten shumë parametra si vlerat e gazrave në gjak, problemet me rrugët e frymëmarrjes, EKG-ja, EEG-ja etj.

TRAJTIMI

Ekzistojnë mënyra të ndryshme për trajtimin e apnesë që zgjidhen për seicilin sipas këshillës së mjekut në bashkëpunim me pacientin, por në përgjithësi, trajtimet kategorizohen në dy: kirurgjikal dhe jo-kirurgjikal.

Trajtimi kirurgjikal

Lloji i ndërhyrjes kirurgjikale varet nga specifikat anatomike individuale dhe nga shkalla e apnesë së gjumit. Ndërhyrja kirurgjikale është një zgjidhje përfundimtare për apnenë obstruktive dhe i jep fund gjithë simptomave që pacienti ka patur më parë. Megjithatë është mjeku kirurg ORL që sugjeron trajtimin e përshtatshëm dhe kohën e duhur për operacion për seicilin pacient.

Shpërndaj
Sëmundje - Probleme.me

Probleme.me prezanton para jush enciklopedinë më të madhe shqiptare për sëmundje. Nëse keni ndonjë sygjerim apo informacion që mendoni se duhet ta mbulojmë na kontaktoni në [email protected]